ኣብ ከተማ ዓድግራት ይሳለጥ ኣብ ዘሎ ህዝባዊ ምኽክር ካብ ሕብረተሰብ ዓዲግራትን ከባቢኣን ንፕረዚደንት ጌታቸው ረዳ ካብ ዝተልዓሉ ሕቶታትን ሪኢቶታትን፦

Sep 4, 2024

~ሐዚ እውን ህዝቢ ትግራይ ንመስዋእቲ ድልው ክኾን ኣይንፈቅድን።

~ሰላም ኣብ ዝዘርጉ ኣካላት ግዝያዊ ምምሕዳር ትግራይ ሕጋዊ ስጉምቲ ክወስድ ይግባእ።

~ሰፊሕ ስግኣት ፀጥታ ኣለና ክስተኻኸል ይግባእ።

~ናይ ማይ ፀገም ስለዘሎ ግድብ ምድማር ይሰርሕልና።

~ንተመዛበልቲ ዞባ ምብራቕ ትግራይ ማዕረ ሽፋን ሚድያ ዘይወሃብ ንምንታይ?

~ምፍኽኻር የጥፍእ እምበር ኣየዕብን።ብዝሰልጠነ ፖለቲካዊ ልዝብ ይፈታሕ።

~ፅልኢ መኻን እያ ሰላም ግን ወላድ እያ ፤ስለዚ ንሰላም ስርሑ።

~ዓበይቲ ዓዲ ይኣክል ኵናት ይኣክል ፅልኢ ክብሉ ይግባእ።

~ንስልጣን ሸበድበድ ንህዝቢ ትግራይ መምከኒ እዩ።

~እቲ ኣብ ኵናት ዕሰል ዝብሃል ዝነበረ መንእሰይ ሎሚ ኣብ ሰላምን ልምዓትን ክዓስል ክስራሕ ኣለዎ።

~መዕርፎ ነፈርቲ ይሰርሐልና ።

~ስድራ ስውኣት ከም ሕብረተሰብ ከይግልገል ዝሰርሑ ኣካላት ኣለዉ።

~ብኩባያ እናሸመትና ዘዕበናዮም ደቅና ተሰዊኦም ክርስዑ ኣይግባእን።

~ናብ ህውከትን ኵናትን ዝመልሱ መራሕቲ ይተኣለዩልና። መንግስቲ እውን ስርዓት የኽብር።

~ከባቢኻ ምልማዕ እምበር ከባቢ መሰረት ዝገበረ ፖለቲካ ኣየድልን።

~ኣነ እየ ዝፈልጠልካ ምባል ይኣክል።

~ዝተፈለየ ሓሳብ ሒዙ ንዝመፀ ሰብ ባንዳ፣ ኳዅቶ፣ጉርዲን ካልኦት ሽማሽምን ምሃብ ከብቅዕ ኣለዎ።

~ናብ ከባቢ ምሽጓጥ ሓድነት ህዝቢ የዕኑ እምበር ሓድነት ኣየጠናኽርን ክስርሐሉ ይግባእ።

~ኣብ ላዕሊ ዘሎ ግዝያዊ ምምሕዳር ክሳዕ ቀበሌ ክወርድ ኣለዎ ምትዕርራይ እውን ክግበር ኣለዎ።

~ከተማና ከተማ ዓዲግራት ብዓቕሚ ዘለዎ መሪሕነት ይመራሕ

~ዝተመዛበለ ሕብረተሰብ ኢሮብ ፣ዛላኣንበሳ፣ጉሎመኸዳ፣ምዕራብ ትግራይ ናብ መረበቱ ይመለስ።

~ህዝብና ካብ ኔትዎርክ ወፃኢ ይመራሕ።

~ሰናይ ምሕደራ ይዕሰል ኣብ ዞባና ፀገም ኣሎ ፤ዝብሉ ከምዝቐረቡ ጉዳያት ኮሙዩኒኬሽን ዞባ ምብራቕ ትግራይ ካብቲ መድረኽ ልኢኹልና።

28 ነሓሰ 2016 ዓ.ም

መቐለ